Lesakako Udalak mugikortasun politikan aitzinera pausoak ematen segitzen du, oinezkoen eta bizikletaren aldeko apustua eginez. Azaroaren 6an, ortzegunean, irekiko da Eltzeta kalea eta Martxanpaita auzoa elkartzen dituen bidea.
Modu hontara, Lesakak Bidasoako bide berdea eta Martxanpaita auzoa elkartzen dituen bidea izanen du, 4,5 km-ko luzera izanen duena. Bizikleta eta oinezkoentzatko segurua eta atsegina den bidea izanen da, eta Biurrana eta Onin errekaen ondotik joanen da.
Obra honen bitartez, Biurrana auzora argiteri publikoa eramateko aprobetxatu da, bizilagunek aspalditik eskatzen zuten oinarrizko zerbitzua eskainiz. Lan hauek hurrengo urtean bukatuko dira.
Obra guztiarien kostua 213.352,26 €-koa da, baina Udalak 165.826,46 €-ko dirulaguntza lortu du Gobernutik, proiektua gauzatzeko laguntza garrantzitsua izan delarik.
Lesakako Udalak eskerrak eman nahi dizkio Lesakako Arcelor Mittal enpresari, proiektu hau gauzatzeko lurren lagapena egiteagatik.
Horrelako proiektuen bitartez, Udalak herritarrak animatu nahi ditu herriko joan-etorriak oinez edo bizikletaz egitera, kotxea beharrezkoa denean soilik erabiliz.