Aste honetan aurkeztu da  Lesakako Herriko Etxean Ipuin Ibilbideak proiektua, herriko haur eta nerabeentzako jarduera berria. Egitasmoaren helburua  gure natura eta kultura ondarea modu hezigarri eta erakargarrian ezagutaraztea da.  

Proiektuaren egilea Lide Igoa Fontan da, Ingurumen Hezkuntza eta Kontroleko ikasketak egiten ari den ikaslea, bere praktika aldia herriko etxean burutuz. Proiektuaren barruan, lau ibilbide  hautatu ditu, eta horietako bakoitzarentzat ipuin bat sortu du, inguruko ohitura, kondaira eta mitologian oinarrituta. Lan hau udalaren laguntzarekin osatu da, irudiekin eta material osagarriekin, parte-hartzea eta esplorazioa sustatzeko. 

Parte-hartzaileek jasoko duten liburuxkak ibilbide bakoitzaren azalpena, ipuina eta QR kodea ditu barne, baita ibilbide guztiak egiteko pasaportea ere. Ibilbide bat bukatzerakoan, Turismo Bulegora joan eta zigilu bat jasotzeko aukera izango dute. Adinaren arabera, 3 edo 4 ibilbide egin ondoren, Ipuin Esploratzailearen Diploma lortzeko aukera izango dute. 

Liburuxkaren formatu fisikoa laster izango da eskuragarri; bitartean, online ikusi daiteke honako esteka honetan: 

https://heyzine.com/flip-book/4c4ab0d801.html 

Eskaintza zabalagoaren barrenean 

Ipuin Ibilbideen aurkezpenean, Lesakako Udalak herritarrei eta bisitariei zuzendutako eskaintza zabalagoaren berri eman du. Bertan aurkeztu dira berzeak bertze: 

• Olentzeroren ginkana digitala, familientzako herria modu dibertigarrian ezagutzeko jarduera
• TopRutas aplikazioan eskuragarri dauden ibilbide tematiko eta mendikoak
• Bizibide, mendiko bizikleta ibilbideen sarea

Jarduera horiek guztiak Lesaka eta inguruak modu osasuntsu, dinamiko eta jasangarrian ezagutzeko aukera ematen dute.