Lesakako Udala

‘Liburu eremua, eremu librea / Territorio libro, Territorio libre’ erakusketa ibiltaria azken helmugara iritsiko da, Lesakako Liburutegia.

Erakustaldia ikusi ahal izanen da Harriondoako Kultur Etxean, eta bertan dagoen Liburutegian, azaroaren 3tik abenduaren 2ra arte.

Nafarroako Liburutegiaren 150. urteurrena eta Nafarroako Liburutegi Publikoen Sarearen 70. urteurrena ospatzeko zikloaren barruan antolatutako erakusketa ibiltaria, ‘Liburu eremua, eremu librea / Territorio libro, Territorio libre’, azken helmugara iritsiko da heldu den asteazkenean, azaroak 3, Nafarroako bertze zenbait liburutegitan izan ondoren (Nafarroako Liburutegia, Altsasu, San Adrián, Iruña-Txantrea eta Murchante).

Erakusketak irakurketa publikoaren iragana eta oraina jorratzen ditu Nafarroan eta bertako liburutegietan.

Lesakako erakusketarako, tokiko liburutegiaren inguruan berezko panela paratu dute. Bertan, liburutegia sortzeko 1954ko Udalaren eskaera, izan diren liburuzainen izenak, edota izan dituen egoitza ezberdinak ezagutzeko aukera izango da, Harriondoako Kultur Etxera iritsi arte.

Irekiera ekitaldian, arratsaldeko 18:00etan, Nafarroako Liburutegi Zerbitzuaren buru den Asun Maestro, eta Lesakako Alkatea, Ladis Satrustregui izanen dira.

Erakusketa eta haurrentzako tailerra

Gaztetxoek ere erakusketaz gozatzeko aukera izanen dute, eta, gainera, haiei zuzendutako tailerra paratu dute, Liburu bat eginen dut, Editargi Nafar Editore Independienteen Elkartearekin elkarlanean. Tailerra azaroaren 17an, asteazkena, emanen da, eta izen-ematea liburutegian egin behar da.